एसटी बसखाली आल्याने दुचाकीस्वाराचा मृत्यू

सिडको : प्रतिनिधी
म्हसरूळ परिसरातील दिंडोरी रोडवर रविवारी सायंकाळी एसटी बसखाली आल्याने दुचाकीस्वाराचा जागीच मृत्यू झाला. मृताची ओळख अद्याप पटलेली नाही.
पोलिसांनी दिलेल्या माहितीनुसार, म्हसरूळ येथील गजपंथ कॉलनीसमोरील बजाज शोरूमजवळून नाशिकहून कळवणच्या दिशेने एसटी बस (एमएच 14 एमएच 1472) जात होती. त्याच दिशेने एक दुचाकी (एमएच 15 जेटी 9338) जात होती. शोरूमजवळ दोन्ही वाहनांमध्ये अपघात होऊन दुचाकी बसच्या चाकाखाली आली. या अपघातात दुचाकीस्वाराचा जागीच मृत्यू झाला. अपघाताची माहिती मिळताच म्हसरूळ पोलिसांनी घटनास्थळी धाव घेतली. पोलिसांनी अपघातग्रस्त दोन्ही वाहने ताब्यात घेतली असून, दुचाकीच्या क्रमांकावरून तसेच उपलब्ध कागदपत्रांच्या आधारे मृताची ओळख पटविण्याचे काम सुरू आहे. सायंकाळच्या वेळी अपघात झाल्याने घटनास्थळी नागरिकांची मोठी गर्दी झाली. त्यामुळे दिंडोरी रोडवर काही काळ वाहतूक कोंडी झाली. पोलिसांनी घटनास्थळी पोहोचून गर्दी हटविली आणि अपघातग्रस्त वाहने बाजूला केल्यानंतर वाहतूक सुरळीत करण्यात आली. या प्रकरणी म्हसरूळ पोलीस ठाण्यात नोंद करण्याची प्रक्रिया
सुरू होती.

Two-wheeler rider dies after coming under ST bus