येवल्यात डंपरच्या धडकेत दोन तरुण ठार

येवला : प्रतिनिधी
शहरातील उपजिल्हा रुग्णालयासमोर शनिवारी
(दि. 13) सकाळी अकराला भरधाव डंपरने दुचाकीला जोरदार धडक दिल्याने झालेल्या भीषण अपघातात दोन तरुणांचा जागीच मृत्यू झाला. अपघातात मृत्यू झालेले तरुण व्यावसायिक कोपरगाव येथील होते. अपघातानंतर डंपरचालक फरार असून, याप्रकरणी येवला शहर पोलिस ठाण्यात डंपरचालकावर गुन्हा दाखल करण्यात आला आहे.
अपघातसंदर्भात मिळालेल्या माहितीनुसार आसिफ मोहम्मद शेख (वय 32) आणि सईफ रफिक शेख (वय 17, दोघे रा. कोपरगाव) हे आपल्या दुचाकीने (एमएच 17, बीडब्ल्यू 5864) जात असताना येवला शहरातील उपजिल्हा रुग्णालयासमोर डंपरने (एमएच 12 एलटी 9980) जोरदार धडक देऊन या दोघांना चिरडले. अपघात एवढा भीषण होता की, डंपरच्या चाकाखाली आल्याने दोघांचाही गंभीर दुखापतीमुळे घटनास्थळीच मृत्यू झाला. या घटनेची माहिती मिळताच पोलिसांनी त्वरित घटनास्थळी धाव घेऊन मृतदेहाची पाहणी केली. डंपरचालकाविरोधात गुन्हा दाखल केला. दोन तरुण व्यावसायिकांच्या मृत्यूनंतर कोपरगावसह परिसरात व खाटीक समाजात तीव्र शोककळा पसरली आहे. पोलीस निरीक्षक संदीप मंडलिक यांच्या मार्गदर्शनाखाली पोलीस तपास करीत आहेत.

Two youths killed in dumper accident in Yewala